| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 57.57 | Dem. 57.61 (English) | >>Dem. 57.64 |
57.60πολλούς , ὦ ἄνδρες δικασταί , οἱ μετʼ Εὐβουλίδου συνεστῶτες καὶ ἀπολωλέκασιν καὶ σεσῴκασιν ἕνεκʼ ἀργυρίου . ἐπεὶ καὶ τὸ πρότερον (ἐρῶ δʼ εἰς αὐτὸ τὸ πρᾶγμʼ , ὦ ἄνδρες Ἀθηναῖοι ) δημαρχῶν ὁ Εὐβουλίδου πατήρ , ὥσπερ εἶπον , Ἀντίφιλος , τεχνάζει βουλόμενος παρά τινων λαβεῖν ἀργύριον , καὶ ἔφη τὸ κοινὸν γραμματεῖον ἀπολωλέναι , ὥστʼ ἔπεισε διαψηφίσασθαι τοὺς Ἁλιμουσίους περὶ αὑτῶν , καὶ κατηγορῶν δέκα τῶν δημοτῶν ἐξέβαλεν , οὓς ἅπαντας πλὴν ἑνὸς κατεδέξατο τὸ δικαστήριον . καὶ ταῦτα πάντες ἴσασιν οἱ πρεσβύτεροι .
57.61πολλοῦ γʼ ἔδεόν τινας ἐγκαταλιπεῖν τῶν μὴ Ἀθηναίων , ὅπου καὶ τοὺς ὄντας πολίτας συνιστάμενοι ἐξέβαλον , οὓς τὸ δικαστήριον κατεδέξατο . καὶ ὢν ἐχθρὸς τῷ ἐμῷ πατρὶ τότʼ οὐ μόνον οὐ κατηγόρησεν , ἀλλʼ οὐδὲ τὴν ψῆφον ἤνεγκεν ὡς οὐκ ἦν Ἀθηναῖος . τῷ τοῦτο δῆλον ; ὅτι ἁπάσαις ἔδοξεν δημότης εἶναι . καὶ τί δεῖ περὶ τῶν πατέρων λέγειν ; ἀλλʼ Εὐβουλίδης αὐτὸς οὑτοσί , ἡνίκʼ ἐνεγράφην ἐγὼ καὶ ὀμόσαντες οἱ δημόται δικαίως πάντες περὶ ἐμοῦ τὴν ψῆφον ἔφερον , οὔτε κατηγόρησεν οὔτʼ ἐναντίαν τὴν ψῆφον ἤνεγκεν · καὶ γὰρ ἐνταῦθα πάλιν ἐμὲ πάντες ἐψηφίσαντο δημότην . καὶ εἴ φασίν με τοῦτο ψεύδεσθαι , ἐπὶ τοῦ ἐμοῦ ὕδατος ὅστις βούλεται τούτων τἀναντία μαρτυρησάτω .
57.62εἰ τοίνυν , ὦ ἄνδρες Ἀθηναῖοι , τοῦτο δοκοῦσιν οὗτοι λέγειν μάλιστʼ ἰσχυρόν , ὡς ἀπεψηφίσαντό μου νῦν οἱ δημόται , ἐγὼ τετράκις ἐπιδεικνύω πρότερον , ὅθʼ ὁσίως ἄνευ συστάσεως ἐψηφίσαντο , καὶ ἐμὲ καὶ τὸν πατέρα δημότας αὑτῶν εἶναι ψηφισαμένους , πρῶτον μέν γε τοῦ πατρὸς δοκιμασθέντος , εἶτʼ ἐμοῦ , εἶτʼ ἐν τῇ προτέρᾳ διαψηφίσει , ὅτʼ ἠφάνισαν οὗτοι τὸ γραμματεῖον · τὸ δὲ τελευταῖον προκρίναντες ἐμὲ ἐψηφίσαντʼ ἐν τοῖς εὐγενεστάτοις κληροῦσθαι τῆς ἱερωσύνης τῷ Ἡρακλεῖ . καὶ ταῦτα πάντα μεμαρτύρηται .
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 57.57 | Dem. 57.61 (English) | >>Dem. 57.64 |
